Wednesday, June 28, 2017

Nerwin Ricohermoso: Tikas ng Isang BAKBAKAN Champion

Kuha ni Rod Valenzuela
Marami sa mga sabungero ang nangangarap na maging BAKBAKAN champion. Kapag nanalo ka kasi rito ay siguradong maisusulat ang iyong pangalan sa kasaysayan ng sabong. Siyempre, ang pangalang Nerwin Ricohermoso ay nakatala na rito. Naging solo champion siya sa BAKBAKAN noong 2014. Halina’t alamin natin ang kanyang istorya sa pagmamanok.

Haiskul pa lang si Nerwin nang magsimula siyang mag-alaga ng manok, pero kinalaunan ay natigil din ito. Nang makapagtapos siya sa pagka-pulis ay bumalik siya sa pagmmaanok. Nakahanap siya ng mga bloodline na kanyang ginamit. Nagseryoso siyang mag-breed may siyam na taon na ang nakararaan.

Naitayo ang farm ni Nerwin na tinatawag na NJMAR Gamefarm noong 2009. May sukat ito na kulang-kulang sa apat na hektarya. Kumuha siya ng mga kagaya ng linyada na kanyang inaalagan noon sa kanilang probinsya.  Pagkatapos ay nagdagdag na lang siya ng mga bagong linyada na local at imported. Kumuha rin siya ng mga tao na makatutulong sa kanyang pagbi-breed.

Kapag namimili ng materyales si Nerwin, ang una niyang tinitingnan ay ang body conformation ng manok. Kung maayos ba ang sukat nito at maganda ang kumbinasyon ng hita. Kailangan, hindi masyadong mahaba ang katawan. Mapula ang mata at makintab ang balahibo.

Sa ngayon, ang kanyang mga linyada ay binubuo ng Black Bonanza, Roundhead Kelso, Blue Face, Gilmore McLean Hatch, Roundhead Brunner at Sweater Kelso. Ang Black Bonanza ay ginamit niya noong magkampeon siya sa BAKBAKAN. Ayon kay Nerwin, “Ang mga white feet namin pati Hatches ay mataas mag-break. Pero may mga manok din kami na ground fighters”.

Ang napanalunang papremyo sa BAKBAKAN ay ginamit niya para madebelop ang kanyang farm at naka-acquire rin siya ng properties para sa manok pa rin. Samantalang ang iba ay ginamit niya sa charity.

Matapos na maging BAKBAKAN champion ay tuluy-tuloy lang ang kanilang production. “Mini-maintain lang namin ang bloodline na nagbibigay ng magandang winning percentage at ng championship sa derbies. Nagdadagdag lang kami ng ibang linyada para sa i-infuse sa mga manok namin,” sabi niya.

Aminado si Nerwin na malaki ang naitulong ng kanyang pagiging BAKBAKAN champion dahil nakilala siya sa industriya ng sabong. Dahil dito ay  dumami ang kanyang mga kostumer mula Luzon, Visayas hanggang Mindanao.

Ikinuwento niya na hindi biro ang pinagdaan ng kanilang grupo bago makamit ang kampeonato sa BAKBAKAN. Mula pa lang sa unang araw ng laban sa Batangas ay nahirapan na sila. Sinabi pa niya na mataas ang standard ng Batangas Breeders Club na kanyang kinaaaniban kung manok lang ang pag-uusapan. Mabibigat din na breeder ang kanilang nakatapat sa Araneta Coliseum. Kumbaga, para silang dumadaan sa butas ng karayom.

Nabanggit ni Nerwin na may nag-alok pa na bilhin na ang kanilang points o entry. Pero nagdesisyon sila ng kanyang grupo na huwag tanggapin ang alok. Aniya, “Pangarap ng bawat breeder na mapasama sa finals sa ganitong big event. Once in a blue moon lang kumatok ang pagkakataon, tatanggihan pa ba namin?”  Mayroon din diumanong mga nakitang sign si Nerwin kabilang na rito ang lilipad-lipad na paru-paro sa kanilang manok, birthday ng kanyang anak at iba pa.

Sa kabilang banda, naniniwala si Nerwin na may pagkakapareho ang pagiging pulis at sabungero. Aniya, “Pareho kasing hobby at passion ang pagpupulis at pagmamanok. Kailangan nasa puso mo ito at isipan. Pareho rin itong profession, as a breeder at pagiging police officer. ” Bilang law enforcer at champion breeder ay nakatatanggap siya ng respeto mula sa mga tao kaya’t ‘di talaga nalalayo ang dalawang ito na pareho niyang pinapahalagahan.

Bilang isang law enforcer, sinisiguro ni Nerwin na ‘di naaapektuhan ang kanyang trabaho dahil sa  pagmamanok. Kapag oras ng trabaho ay trabaho lang talaga. May mga pinagkakatiwalaan naman siyang mga tao sa kanyang farm kaya’t tuluy-tuloy ang operasyon nito kahit wala pa siya.

Nang tanungin kung ano pa bang kampeonato ang gusto niyang makamit, sinabi niyang “Gusto ko uling mapanalunan ang BAKBAKAN. Pangarap ko ring magkampeon sa World Slasher Cup o ‘di-kaya’y sa Digmaan.” Bukod sa pagiging kampeon sa BAKBAKAN, naka-score rin siya ng maganda sa Barkadahan noong 2016. Naka-9 points siya rito.

May payo si Nerwin sa mga nag-uumpisa pa lang na magmanok. Aniya, “Payong kapatid lang, huwag pupuwersahin o madadaliin ang pagmamanok. Puwede naman tayong mag-umpisa nang pakunti-konti lang. Isa, dalawa o tatlong materyales lang muna”. Siguraduhin din diumano na bago ilaban ang manok ay naihanda ito nang husto at ‘di basta na binubunot na lang sa cording area. Naniniwala siya na kapag mas mahaba ang preperasyon ay mas magiging maganda ang performance sa laban.  Maliban dito, huwag daw masyadong karerin ang pagsasabong dahil baka dumating sa punto na pati ang perang para sa pagkain ng pamilya ay maipusta na.

Sa mga sumasali sa BAKBAKAN, “Mabigat na labanan ito, paghandaan natin ito. Pare-parehong namamalo ang manok. Maging sport tayo kung sino man ang manalo. Kailangan tanggapin natin nang maluwag sa ating dibdib.

Maaaring kontakin si Nerwin sa numerong 0915-177-2304. Puwede ring kontakin ang kanyang farm manager na si Fred sa numerong 0947-351-0398. 

Sponsor

Recent Posts